मुख्य संपादक विनायक पाटील
चोपडा शहर पोलीस ठाण्यात सावकारी पद्धतीने कर्ज देऊन जास्तीचे व्याज वसुलीसाठी धमक्या देणाऱ्या 9 जणांविरुद्ध गुन्हा दाखल करण्यात आला आहे. लोंणी पंचक येथील तलाठी अरविंद लिलाधर जाधव यांनी दिलेल्या तक्रारीवरून हा गुन्हा नोंदवण्यात आला आहे.
*2022 पासून कर्ज-जाच सुरू*
तक्रारदार अरविंद जाधव, वय 33, हे लोंणी पंचक येथे तलाठी म्हणून कार्यरत आहेत. त्यांनी कौटुंबिक अडचणीसाठी 7 जानेवारी 2022 ते 5/4/ 2026 दरम्यान संशयितांकडून वेळोवेळी कर्ज घेतले होते. कर्जदारांनी फेड केलेले असूनही जास्तीचे व्याज वसुलीसाठी वारंवार फोन, गुगल पे, फेसबुक मेसेंजरद्वारे संपर्क करून शिवीगाळ व धमक्या दिल्या, असा आरोप तक्रारीत आहे.
*काना हॉटेलजवळ मारहाणीचा प्रयत्न*
14 मे 2026 रोजी सायंकाळी 7:30 वाजता चोपडा येथील काना हॉटेलजवळ वडाच्या झाडाखाली तक्रारदारांना बोलावून संशयितांनी मानसिक त्रास दिला व मारहाण करण्याचा प्रयत्न केला. त्यानंतर तक्रारदार जिवघेण्या भीतीने जळगाव येथील धन्वंतरी हॉस्पिटलमध्ये दाखल झाले होते. त्यानंतर जिल्हाधिकारी यांच्या आदेशानुसार पोलीस अंमलदाराचा जबाब नोंदवून गुन्हा दाखल करण्यात आला.
*BNS व सावकारी कायद्यांतर्गत गुन्हा*
चोपडा शहर पोलीस ठाण्यात गु.र.नं. 274/2026 नुसार भारतीय न्याय संहिता कलम 296, 352, 351(2), 351(3), 3(5) तसेच महाराष्ट्र सावकारी नियमन अधिनियम 2014 चे कलम 39, 45 प्रमाणे गुन्हा दाखल झाला आहे.
*9 आरोपींविरुद्ध गुन्हा*
या प्रकरणी सुनी उर्फ सुनील प्रकाश शिरसाट, बंटी उर्फ अशोक कैलास मेराठे, कटेरी दिलीप धोरात, स्पेश गोखुल भारोसे, शामकांत भाऊराव जाधव, नरेश कैलास साळुंखे, ज्ञानेश्वर रामदास सोनवणे, निलेश पांडुरंग वाघेरे, मंगल पांडुरण पाटील या 9 जणांची नावे आरोपी म्हणून नोंदवण्यात आली आहेत.
*पुढील तपास सुरू*
या गुन्ह्याचा तपास पोउपनि. योगेश्वर किशोर हिरे हे करत आहेत. तपासाची जबाबदारी चोपडा शहर पोलीस ठाण्याचे प्रभारी अधिकारी पो.नि. पवनकुमार देसले यांच्याकडे आहे.
सावकारीच्या नावाखाली होणाऱ्या मानसिक व शारीरिक छळाला आळा बसावा यासाठी पोलिसांनी गुन्हा दाखल करून पुढील तपासाला गती दिली आहे.
मुख्य संपादक : विनायक पाटील
