मुख्य संपादक विनायक पाटील
चोपडा, १५ जानेवारी २०२६ – चोपडा शहर पोलिस स्टेशन, जिल्हा जळगाव येथे नोंद असलेल्या गुन्हा क्रमांक ०१/२०२६ मधील आरोपी दिलीप लक्ष्मण नेवे यांचा जामीन अर्ज न्यायालयाने फेटाळला आहे. आरोपीविरुद्ध भारतीय न्याय संहिता, २०२३ मधील कलम १९६(१)(अ), ३५३(२), ३५६(२) व ३५६(३) अंतर्गत गुन्हा दाखल करण्यात आला आहे.
जामिनासाठी आरोपीने भारतीय नागरिक सुरक्षा संहिता, २०२३ च्या कलम ४८३ अंतर्गत अर्ज दाखल केला होता. त्यात त्याने आपण निर्दोष असल्याचा दावा केला असून, शारीरिक कोठडीची गरज नसल्याचे कारण देत जामिनाची मागणी केली होती. सरकारी पक्षाने कडाडून विरोध केला. तपास अधिकारी व सहाय्यक सरकारी वकिलांनी न्यायालयात उत्तर सादर करून सांगितले की, आरोपीविरुद्ध समाजात तीव्र नाराजी आहे. जामिनावर सुटल्यास चोपडा शहरातील कायदा व सुव्यवस्थेचा प्रश्न निर्माण होऊ शकतो, तसेच तपासात अडथळा व पुराव्यांशी छेडछाड होण्याची शक्यता नाकारता येत नाही.
*आरोपाचा सारांश*
फिर्यादीच्या तक्रारीनुसार, आरोपी व तक्रारदार हे फेसबुकवरील कॉमन फ्रेंड्स आहेत. ३ जानेवारी २०२६ रोजी आरोपीने फेसबुकवर शेअर केलेल्या एका पोस्टमध्ये डॉ. बाबासाहेब आंबेडकर यांच्याविषयी आक्षेपार्ह शब्दांचा वापर केला असल्याचा आरोप आहे. सदर पोस्ट दोन समुदायांमध्ये तेढ निर्माण करणारी व विशिष्ट धर्माविरोधात असल्याचे नमूद करण्यात आले आहे.
*न्यायालयाचे निरीक्षण*
न्यायालयाने नमूद केले की, पोलिस तपास अहवालानुसार आरोपीची या गुन्ह्यात सक्रिय भूमिका दिसून येते. कलम १९६(१)(अ) हा गुन्हा अजामीनपात्र आहे. तपासादरम्यान आरोपीचा मोबाईल अद्याप जप्त झालेला नसून, साक्षीदारांचे जबाब नोंदवणे व अन्य महत्त्वाचे पुरावे गोळा करणे बाकी आहे. अशा स्थितीत आरोपीला जामिनावर सोडल्यास तपासावर प्रतिकूल परिणाम होऊ शकतो, असे न्यायालयाने स्पष्ट केले.
सर्व बाबींचा सखोल विचार करून न्यायालयाने आरोपी दिलीप लक्ष्मण नेवे यांचा जामीन अर्ज फेटाळला व संबंधित आदेशाची माहिती चोपडा शहर पोलिस स्टेशनला देण्याचे नर्देश दिले.
मुख्य संपादक : विनायक पाटील
