अमळनेर प्रतिनिधी दिलीप पवार
अमळनेर: तालुक्यातील सावखेडा ते मुंगसे, डापोरी, रुंधाटी, मठगव्हाण या गावांना जोडणाऱ्या मुख्य डांबरी रस्त्याची रेती वाहतूक करणाऱ्या ओव्हरलोड डंपरमुळे पूर्णपणे दुरवस्था झाली आहे. डांबरी रस्त्याचे आता कच्च्या रस्त्यात रूपांतर झाले असून नागरिकांत तीव्र नाराजी आहे.
या मार्गावरून दररोज शेकडो रेतीचे डंपर ये-जा करत असल्याने रस्त्यावर मोठमोठे खड्डे पडले आहेत. जागोजागी दगड व माती उघडी पडल्याने साधी मोटरसायकल चालवणे देखील अवघड झाले आहे. पावसाळ्यापूर्वी रस्ता दुरुस्त न झाल्यास वाहतूक पूर्णपणे ठप्प होण्याची भीती ग्रामस्थांनी व्यक्त केली.
शालेय विद्यार्थी, रुग्ण व शेतकऱ्यांना याचा मोठा फटका बसत आहे. अनेक दुचाकीस्वार घसरून पडल्याच्या घटना घडल्या आहेत. “रेती डंपरच्या बेशिस्त वाहतुकीमुळे चांगला रस्ता उद्ध्वस्त झाला. प्रशासनाने तातडीने दुरुस्ती करावी व ओव्हरलोड वाहतुकीवर बंदी घालावी,” अशी मागणी सावखेडा, मुंगसे, डापोरी, रुंधाटी व मठगव्हाण येथील ग्रामस्थांनी केली आहे.
संबंधित विभागाने त्वरित दखल घेऊन रस्त्याची दुरुस्ती करावी व जड वाहनांना पर्यायी मार्ग द्यावा, अन्यथा तीव्र आंदोलन छेडण्याचा इशारा नागरिकांनी दिला आहे.
मुख्य संपादक : विनायक पाटील
