मुख्य संपादक विनायक पाटील
धरणगाव: तालुक्यातील एका जिल्हा परिषद शाळेतील मुख्याध्यापकाने चौथीच्या वर्गात शिकणाऱ्या 10 वर्षीय विद्यार्थिनीवर मागील दोन वर्षांपासून लैंगिक अत्याचार केल्याची संतापजनक घटना उघडकीस आली आहे. धरणगाव पोलिसांनी मुख्याध्यापक नंदलाल नारायण मराठे याला अटक केली असून त्याच्याविरुद्ध पोक्सो कायद्यांतर्गत गुन्हा दाखल करण्यात आला आहे.
मिळालेल्या माहितीनुसार, पीडित मुलगी धरणगाव तालुक्यातील एका गावातील जि.प. शाळेत इयत्ता चौथीत शिकते. आरोपी मुख्याध्यापक शाळा भरण्यापूर्वी सकाळी 10 वाजता झाडू मारण्याच्या बहाण्याने मुलीला शाळेत लवकर बोलावून घेत असे. शाळेत कोणी नसल्याचा गैरफायदा घेऊन तो तिच्यावर अत्याचार करत होता. तिला मोबाईलवर अश्लील व्हिडिओ दाखवल्याचाही आरोप आहे.
पीडितेने विरोध केल्यास आरोपी तिला मारहाण करायचा व “आई-वडील मरून जातील” अशी धमकी देऊन गप्प बसवायचा. उन्हाळी सुट्टीत मावशीकडे गेल्यावर मुलीची तब्येत बिघडली व तिने जेवण बंद केले. नातेवाईकांनी विश्वासात घेतल्यानंतर तिने घडलेला प्रकार सांगितला.
शाळेच्या शेवटच्या दिवशी, 30 एप्रिल रोजीही आरोपीने अत्याचार केल्याचे समोर आले आहे. पीडितेच्या आईच्या तक्रारीवरून धरणगाव पोलिस ठाण्यात विविध कलमांसह पोक्सो अंतर्गत गुन्हा नोंदवण्यात आला. पोलिसांनी तातडीने कारवाई करत आरोपी मुख्याध्यापकाला अटक केली.
या घटनेचा पुढील तपास पोलीस उपनिरीक्षक संतोष पवार करत आहेत. या घटनेमुळे जळगाव जिल्ह्यात संताप व्यक्त होत असून आरोपीवर जलदगती न्यायालयात खटला चालवून कठोर शिक्षा देण्याची मागणीहोत आहे.
मुख्य संपादक : विनायक पाटील
