मुख्य संपादक विनायक पाटील
चोपडा: गोपनीय माहितीच्या आधारे तात्काळ कारवाई करत चोपडा शहर पोलिसांनी एका अल्पवयीन मुलीचा बालविवाह वेळीच थांबवला. पोलीस निरीक्षक पवन देसले यांच्या नेतृत्वाखालील पथकाने घटनास्थळी धाव घेऊन विवाह रोखत दोन्ही कुटुंबांचे समुपदेशन केले.
पोलिसांना शहरात एका ठिकाणी बालविवाह होणार असल्याची गुप्त माहिती मिळाली होती. माहिती मिळताच पो. नि. पवन देसले, पीएसआय युवराज वाळुंज, पो. कॉ. विलास पारधी व पो. कॉ. निलेश वाघ यांच्या पथकाने तात्काळ घटनास्थळी भेट देऊन विवाह रोखला. चौकशीत मुलीचे वय 18 वर्षांपेक्षा कमी असल्याचे स्पष्ट झाले.
पोलिसांनी दोन्ही कुटुंबांचे समुपदेशन करून बालविवाहाच्या कायदेशीर परिणामांची जाणीव करून दिली. विवाहाच्या वेळी मुलीचे वय 18 वर्षे आणि मुलाचे वय 21 वर्षे पूर्ण असणे कायद्याने बंधनकारक आहे. या वयापेक्षा कमी वयाच्या मुला-मुलींचा विवाह हा कायदेशीर गुन्हा आहे, असे पोलिसांनी सांगितले.
बालविवाह प्रतिबंध कायद्यानुसार, बालविवाह करणे, लावून देणे किंवा त्यास प्रोत्साहन देणे या गुन्ह्यासाठी कठोर शिक्षेची तरतूद आहे. बालविवाह करणारे वर-वधू, त्यांचे पालक, नातेवाईक, लग्न लावणारे भटजी, पत्रिका छापणारे, मंगल कार्यालय व्यवस्थापक, केटरर्स आणि उपस्थित असणारे सर्वजण दोषी मानले जातात.
“बालविवाह हा सामाजिक दुष्परिणामांसोबतच कायदेशीर गुन्हा आहे. नागरिकांनी अशा घटनांची माहिती तात्काळ पोलिसांना द्यावी,” असे आवाहन पोलीस निरीक्षक पवन देसले यांनी केले आहे
मुख्य संपादक : विनायक पाटील
